Fâ‘ilâtün fâ‘ilâtün fâ‘ilâtün fâ‘ilün
 
1 Dil ile hâlât-ı dil-dârı hisâb itdim bu şeb
Mâcerâmız deftere sıgmaz hisâb itdim bu şeb
2 Oldıgını hep belâ dilden yakînen cezm idüp
Nîk ü bedi müstakîmâne hisâb itdim bu şeb
3 Bâtın u zâhir baña dil-dârdan lutf u ‘atâ
Vezne urdım ‘akl ile bir bir hisâb itdim bu şeb
4 Kudrete itdi ta‘alluk mâcerâlar tâ ezel
Bilmedim sırr-ı ezel ne çok hisâb itdim bu şeb
5 Zûr ile kâma irilmez dâd-ı Hakka bakmalı
Hep ‘inâyât-ı ezeldür çün hisâb itdim bu şeb
6 Sa‘y(i) de inkâr idemem sa‘y(i) viren Ol durur
Hâsılı endîşeler ‘âciz hisâb itdim bu şeb
7 Vâdî-i teslîmden gayrı ne çâre Sıdkiyâ
Gavra varılmaz ne mümkin çok hisâb itdim bu şeb

Dr. Abdullah EREN, MEHMED SIDKÎ DÎVÂNI, https://ekitap.kulturturizm.gov.tr/Eklenti/10625,mehmed-sidki-divanipdf.pdf?0