Dilâ evvel göñüldi yâr-ı gâr ol gitdi ben kaldum
29.07.2017
Mefâ‘îlün Mefâ‘îlün Mefâ‘îlün Mefâ‘îlün
1. Dilâ evvel göñüldi yâr-ı gâr ol gitdi ben kaldum
Gam-ı dirînemüzden gussa-hºâr ol gitdi ben kaldum
2. Gül-i ruhsâruñ idi behçet-i cân u dil-i zârum
O dahı şimdi oldı gözde hâr ol gitdi ben kaldum
3. Senüñ ‘ışkuñdan özge var mı şimdi mâ-melek gayrı
Derûn bîrûn gamuñla her ne var ol gitdi ben kaldum
4.4a Benümsin ben senüñ zanneyler idüm bir zamân ammâ
Sen olduñ âşinâ-yı sad-hezâr ol gitdi ben kaldum
5. Saña ‘âşık degülken ‘âr u nâmus idi endîşem
Hebâ oldı sevelden neng ü ‘âr ol gitdi ben kaldum
6. Göñül peykân-ı gamla ülfet itdi kaldı göñlümde
Der-âhirkâr o da itdi güzâr ol gitdi ben kaldum
7. Gam-ı agyâr u fikr-i yâr idi cân yoldaşum ‘umrâ
Benümle olmadı bir lahza yâr ol gitdi ben kaldum
8. Çıkardum tâ Hüseyniyye biraz eyyâm efgânı
Muhayyer oldı vuslatda karâr ol gitdi ben kaldum
9. Ser-i şeh-râh-ı vuslatda piyâde idüm ey Kânî
Çün oldı eşheb-i nâza süvâr ol gitdi ben kaldum
Dr. İlyas YAZAR , K Â N Î D Î V Â N I, Ankara 2012
Yorum Yapmak için Kayıt Olun veya Giriş Yapın