Dün neydi cevânân ile meydân-ı harâbât

Mef`ûlü mefâ`îlü mefâ`îlü fa'ûlün

 

 1 Dün neydi cevânân ile meydân-ı harâbât

 Bâzîçe-i tıflân idi pîrân-ı harâbât

 2 Her subh varur himmet umar pîr-i mugândan

 Zühhâd ile bahs itmege rindân-ı harâbât

 3 Sâkî yine âbâd ide gör kasr-ı safâyı

 Gördük ki yıkılmış yatur erkân-ı harâbât

 4 Vasf eylemenüz mey-kedede fushat-ı bâgı

 Gâyet sıkılur gûşe-nişînân-ı harâbât

 5 Maksûdun irişmekse fenâ içre fenâya

 Yahyâ ola gör sâkin-i vîrân-ı harâbât

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147