Mefâ`îlün mefâ`îlün mefâ`îlün mefâ`îlün
 
 1 Düşer mi sana ey dil dâ'im ümmîd-i vefâ itmek
 Güzeller şânıdur gâhî vefâ gâhî cefâ itmek
 
 2 Safâdan gayrı ben âlemde hîç (bir)nesne bilmezdüm
 Beni ey aşk senden oldı gamla âşinâ itmek
 
 3 Egerçi pençe-i hûrşîdsin tâb-ı melâhatle
 Bizümle nice bir câna ırakdan merhabâ itmek
 
 4 Ne`âlemdür ne hazzdur bir müferrah cây-ı hurremdür
 Muvâfık bir iki yârân ile ayş u safâ itmek
 
 5 Devâm-ı devlet-i Sultân Murâdı isterüz Yahyâ
 Inâyet Hazret-i Allâh'dan bizden du`â itmek
 
 6 Sözünde dâverâ insâf odur kim başka âlem var
 Suhan mir'âtini ancak olur `âlem-nümâ itmek
 
 7 Nice pâkîze ma`nâlar hayâl itmek olur ammâ
 Nice mümkin şeh-i devrân gibi nâzük-edâ itmek
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147