Düşüpdür san ki yârândan cüdâ bir nâ-tüvân tenhâ

[mefâ’îlün mefâ’îlün mefâ’îlün mefâ’îlün]

 

1 Karâr u sabr gitdi kaldı bâkî cism ü cân tenhâ

Düşüpdür san ki yârândan cüdâ bir nâ-tüvân tenhâ

 

2 Degül peykânlaruŋ yir yir bu cism-i nâ-tüvânumda

Saŋa şerh-i gam içün her biridür bir zebân tenhâ

 

3 İŋilder bezm-i gamda üstühˇânum ney gibi her dem

İçelden sen ‘adûlarla şarâb-ı ergavân tenhâ

 

4 Gül ile nergis ey dil gülşen içre göz kulag olmış

Bugün gül-geşt idermiş diyü ol serv-i revân tenhâ

 

5 Felekde zerre-veş ey meh ‘aceb mi bî-karâr olsam

Cihânı sâyelerle seyr idersin her zamân tenhâ

 

6 Dile peykânuŋı gönder baŋa dil yardımın itsün

Nice şerh eylesün derd-i derûnı bir zamân tenhâ

 

7 Togardı başuma burc-ı şerefden gün benüm Rahmî

Geleydi hücreme bir şeb ger ol mâh-ı cihân tenhâ

 

 

Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,