El-hak ol Hakdur vücûd iy pâk-dîn
20.06.2017
El-hak ol Hakdur vücûd iy pâk-dîn (479/1)
Her ne varlıh varsa andandur yakîn
Anda me’hûz olmasa_esmâ vü sıfât (479/2)
Cem-i cem olur makâm iy pâk-dîn
Çünki me’hûz ola esmâ vü sıfât (479/3)
Cem olur hem ulûhiyyet mübîn
Geldi_âhadlıh cem-i ceme mertebe (479/4)
Cemde oldı aña vâhidlıh karîn
Kamu birdür iki görmek şirk olur (479/5)
Şirki ko tevhîde var iy râst-bîn
Evvel Âhır Zâhir ü Bâtın hem ol (479/6)
Pes hakîkatda vücûd oldur hemîn
Bir deñiz geh katre olur geh sehâb (479/7)
Gâh hâr u gâh gül geh yâsemîn
Gâh hanzal olur u geh ney-şeker (479/8)
Gâh bürr-i pâk ü geh dürr-i semîn
Kamu güri bahra döner bahr olur (479/9)
Pes ta addüdsüz nice olur metîn
Bir güneş yüz bacada yüz şekl olur (479/10)
Lîki cümle bir olur iy pâk-dîn
Ahmak olma mâyı ko kim kala hak (479/11)
Ahmedîden diñle sözüñ râstın
Egerçi_añmaz beni zülfüñ vefâdan (480/1)
Gözüñ bir lahza unıtmaz cefâdan
Nefes mihrüñden urdı sıdk-ıla subh (480/2)
Cihân uş rûşen ol nûr u safâdan
Yüzüñi ol ider teşbîh aya (480/3)
Ki bilmez nicedür nûrı ziyâdan
Nikâb açduñ gül karşu meger kim (480/4)
Kızarup yüzi kan derler hayâdan
İrürdi cânuma zülfün hevâsı (480/5)
Anı kim irişür şema sabâdan
Gözüñden zahmuma rahm ummazam kim (480/6)
Hatâ olur savâb ummah hatâdan
Gözüñ kaşuñ kemânından ne atsa (480/7)
Benüm cânuma irişür kazâdan
Belâ gördüm gözüñden kûh-ı bâlâ (480/8)
Dahı n’isder aceb bu mübtelâdan
İşidüp Ahmedî sözini uşşâk (480/9)
Muhayyer oldı ol sâz u nevadan
Dr. Yaşar AKDOĞAN, Ahmedî DÎVÂN https://ekitap.kulturturizm.gov.tr/Eklenti/10591,
Yorum Yapmak için Kayıt Olun veya Giriş Yapın