EL-MUKATTAT 2
 
..-- / ..-- / ..-- / ..-
 
Dil-i şûrîde ile ‘azm –ı harâbât itme
Mey-i engûr ile hall bir dahi hem-vâr olmaz
Vefk-i nîsân-ı vücûd mâye-i nîk ü bed iken
Dürr olmış tutalum her biri şehvâr olmaz
‘Aşk-ı ma‘şûk füzûn-ter gerek ‘âşıkdan kim
Nakş-ı hoş-sûret-i bîr ü hade dil-dâr olmaz
‘Aşk kim sîne-i ‘âşıkda nümâyân olmaz
Tûrda nahl-ı tecellî de belî nâr olmaz
Rûy-ı hat-âver-i dil-ber dile âteş urmaz
Der-küsûf tal‘at-ı hurşîdde envâr olmaz
Bir gazab olmaz meh-i ‘âşukuñ efgânından
Ehl-i dil nâle-i bülbül ile bîzâr olmaz
Ne kadar hırs ile dil nâzır-ı devlet olsa
Nân-ı nâ-puhtede sîr-i şikem-i hâr olmaz
Ehl-i dil fakr-ı libâs ile olur cilve-nümâ
Nûr-ı meh tîre-şeb olmazsa nümûdâr olmaz
Meşreb-i sâf ile mecûsi mey-i nârın gör
Hemçü sîm-âb bu dil şîşede firâr olmaz
Daha kimine eser eyleyemez ta‘n-ı ‘adû
Bahr-i ebyaz has u hâşâk ile mürdâr olmaz
15a.
Şi‘r çokdur bu cihân içre Sa‘îdâ ammâ
İsti‘ârât ile böylece eş‘âr olmaz
 
Saadet Karaköse, : Sa’id Giray Dîvânı, : © T.C. Kültür ve Turizm Bakanlığı Kütüphaneler ve Yayımlar Genel Müdürlüğü,2017 ISBN: 978-975-17-3636