Mefâ‘îlün Mefâ‘îlün Mefâ‘îlün Mefâ‘îlün
1. Elâ ey tâlib-i gencîne-i esrâr-ı sultânı
Suhanla kıl ‘imâret bu kühen-bünyâd-ı virânı
2. Getür nazma perîşân sözleri çün lü’lü-i manzûm
Nizâmü’l-mülk-i ma‘nî ol misâl-i mîr-i hâkânı
3.3a İrişdür pâye-i şi‘ri bülend-eyvân şu‘arâya
İdüp âvîze bir bâlâ-yı pervîn nazm-ı subhânı
4. Celâle’d-dîn-i Mevlânâ kitâb-ı Mesnevîsinde
Kerâmât-ı bülend-i evliyâdandur dimiş anı
5. İdüp âmîhte hikmetle revnak vir mazâmîne
Tasavvuf ile behişt ‘âcil eyle bezm-i ‘irfânı
6. Velî inşâ-i menşûrı bırakma zü’l-cenâheyn ol
Şikâr it soñra nesr-i tâ’ir-i gerdûn-ı gerdânı
7.7a Cihanda şöyle tohm-efşân-ı nesr ol k’ide âsâruñ
Misâl-i kalb-i dânâ pür bu heft-anbâr-ı devrânı
8. Tahallus itmek isterseñ sözüñ hüsni yeter mahlas
Miyân-ı ehl-i dilde olsa da bahş-ı suhandânı
9. Şu gevherler ki nesr itdüm anı zîb-i binâgûş it
Eger olmak dilerseñ ‘âlem içre ma‘rifet Kânı
Dr. İlyas YAZAR , K Â N Î D Î V Â N I, Ankara 2012