Elvedâ edüp şehâ sen âfet-i dil-hâh ile ( Tesdîs )
02.09.2016Tesdîs
I
Elvedâ edüp şehâ sen âfet-i dil-hâh ile
Hem-dem oldum eşke yoldaş oldum âh u vâh ile
Râh-ı hicrânı tutup bir kaç nefer hem-râh ile
Bu dil-i âvâremün tıflın koyup sen şâh ile
Ben diyâr-ı gurbete gitdüm figân u âh ile
Gönlümi cânâ sana ısmarladum Allâh ile
II
Hayret-i hicrân alup aklum yitirdim kendüzüm
La’l-i nâbun yâdına her hem tolu kandur gözüm
Kâkülün gibi firâkunda perîşândur sözüm
Fark olınmaz hatt u haddünsüz giceyle gündüzüm
Eşk-i çeşmüm gibi düşkündür meger kim yılduzum
Ay geçer bir gün mukârin olmazın ol mâh ile
III
Kul olup sen şâh-ı hüsne gamdan âzâd oldı dil
Hecr ile gam-gîn iken mihrünle dil-şâd oldı dil
Her cefâya kâ’il ü her derde mu’tâd oldı dil
Bir harâb-âbâd idi şekunla bünyâd oldı dil
Mesken-i sultân-ı ‘aşk olaldan âbâd oldı dil
Hak budur kim memleket ma’mûr olurmış şâh ile
IV
Mâl-i dehr ile eger Kârûndan urur ise dem
‘Iyş u ‘işretle elinde olsa dâ’im câm-ı Cem
Dise kim asl u nesebde nesl-i şâh-ı ‘âlemem
Lîk münkir olsa ehl-i hâle ‘aşkı itse zem
Câh ile âdem diyüp âdem yirine komazın
Göklere irsün gerekse başı ‘izz ü câh ile
V
Gayrıdan geç bende ol gel pâdişâh-ı mihnete
Var erenler yolına katıl sipâh-ı mihnete
Baş u cân vir kâ’il ol feryâd u âh-ı mihnete
Terk-i ‘akl u sabr kıl girdünse râh-ı mihnete
Kim çıkılmaz bu tarîka Fevriyâ hem-râh ile
Kalpaklı, Mehmet (hzl.) (1991). Divan Şiirinin Edisyonunda Bilgisayar Kullanımı Metoduna Giriş ve Fevri Divanı’nın Elektronik Formu. Doktora Tezi. İstanbul: İstanbul Üniversitesi.
0
1
Yorum Yapmak için Kayıt Olun veya Giriş Yapın