Mefâîlün mefâîlün mefâîlün mefâîlün

 

1 Esîr oldun o kâfir hâl ü zülf-i dil-rübâdan geç

Tutuldun murgveş ol dâne vü dâm-ı belâdan geç

 

2 Çekilmez renciş-i tıflânesi hûbân-ı devrânın

Düçâr-ı aşk olup vaz'-ı cünûn-ı nâ-revâdan geç

 

3 Temâşâ-yı cihâna câm-ı mey mir'ât-ı kâfîdir

Gel ol âyîne-i İskender-i âlem-nümâdan geç

 

4 Sana cism-i Hudâ-dâdın gibi zîbâ kumaş olmaz

Hevâ-yı kâle-i dîbâ-yı dehr-i bî-bekâdan geç

 

5 Cihânda bâde iç mahbûb sev neyler isen eyle

 Hemân Meşhûriyâ mânend-i sûfî şu riyâdan geç

 

Yaşar AYDEMİR-Halil ÇELTİK, MEŞHURÎ DİVANI (Tenkitli Metin), T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3196 KÜLTÜR ESERLERİ, Ankara 2009