Eşkümi cûy-ı revân cismümi hâşâk itdüm

 

Fe`ilâtün fe`ilâtün fe`ilâtün fe`ilün

 

 1 Eşkümi cûy-ı revân cismümi hâşâk itdüm

 Gülşen-i kûyuna irdüm işümi pâk itdüm

 2 Rûy-mâl ola müyesser o kef-i pâya diyü

 Nice yıl râh-güzârında yüzüm hâk itdüm

 3 Aşikâr itmege dâg-ı dili emr eyledi `aşk

 Lâleveş bir nice yerden tenümi çâk itdüm

 4 Yâr korkum bu ki nâz uyhusına varmış idi

 Asitânında gice nâleyi bî-bâk itdüm

 5 Minnet Allâh'a ki Sultân Murâd'un Yahyâ

 Çerhden kadri bülend oldugın idrâk itdüm

 6 Bâz-ı himmetle şikârın alup in-şâ`allâh

 Diye mürg-i zaferi beste-i fitrâk itdüm

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147