Ey baña dermân soran derdi haber vir sen baña
06.06.2016
Fâ‘ilâtün Fâ‘ilâtün Fâ‘ilâtün Fâ‘ilün
1 Ey baña dermân soran derdi haber vir sen baña
Dôst yolında cân viren merdi haber vir sen baña
2 ‘Ayn ü şîn ü kâf içinde gördügüm seyrân-ı Hû
‘Ayn-ı vuslat harfi kim gördi haber vir sen baña
3 Kâmil insânıñ yolında cânı kurbân itmeden
Sohbet-i Sultâna kim irdi haber vir sen baña
4 Kimdür ol hânıñ yolında var varından vaz gelen
‘Aşkına fermân olan ferdi haber vir sen baña
5 Ehl-i derdiñ tapusında zâr u giryân olmadın
Devlet-i Hak devri kim sürdi haber vir sen baña
6 Kul gerek sultân öñünde kulluga bel baglaya
Ol mübârek bâba kim girdi haber vir sen baña
7 Bu Sinân Ümmî olupdur bâb-ı ‘aşkıñ bendesi
Ol kapudan anı kim ırdı haber vir sen baña
Doç. Dr. A. Azmi BİLGİN,ÜMMÎ SİNAN DİVANI,K.veTurzm.Bak.,ekitap.kulturturizm.gov.tr
Yorum Yapmak için Kayıt Olun veya Giriş Yapın