Ey Mesîhâ-dem dönüp bir kez nazar kılmaz mısın

 

Fâ‘ilâtün/ Fâ‘ilâtün/ Fâ‘ilâtün/ Fâ‘ilün

 

Cân u başı niçe kılmayam fidâ cânâ saña

Ben degül hep bende olmışdur bütün dünyâ saña

Ey Mesîhâ-dem dönüp bir kez nazar kılmaz mısın

Mürde diller çagırup dirlerse yâ ‘Îsâ saña

Ta‘n u teşnî‘ eylemezdüñ baña ey zâhid eger

‘Ârızın ‘arz itse bir gün ol melek-sîmâ saña

Kılmaduñsa zülfinüñ çengâline cânuñ fidâ

Nakd-i ‘ömri yirine harc itmedüñ hayfâ saña

Kûy-ı yâri cânuñ ey Ravzî çıkınca bekledüñ

Bâg-ı Firdevs-i cinân olmak gerek me’vâ saña

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009