TEVHÎD

 

Fâ‘ilâtün Fâ‘ilâtün Fâ‘ilâtün Fâ‘ilün

Remel - + - - / - + - - / - + - - / - + -

 

01. Éy nesîm-i kudretüñ nefhinde âdem bir nefes

 V’éy harîm-i gülşen-i lutfuñda ‘âlem hvâr u has

02. Zikr-i hamdüñdür ki her milletden oldı âşikâr

 Ka‘be’den âvâz-ı hû büt-hâneden bâng-i ceres

03. Sensin ol bî-çün ki birdür saña nisbet her mekân

 Kurb u bu‘d u taht u fevk ü sağ u sol u pîş ü pes

04. Nâr-ı Mûsî’dür celâlüñ şemmesinden bir eser

 Nûr-ı Ahmed’dür cemâlüñ pertevinden bir kabes

05. Tâlib-i dîdâr olan dil-teşne vü ğam-dîdeler

 Cûy-i hûn akıtdılar gözden çü Ceyhûn u Aras

06. Zâlim ü bî-dâd içün dergâh-ı ‘adlüñdür penâh

 Zulm-i bî-feryâd içün yâduñ durur feryâd-res

07. Bulmasa tañ mı cihân zindânı bendinden halâs

 Aña kim bu şeb-rev-i İblîs-i nefs oldı ‘ases

08. Dâne içün dâm-ı hırsa düşse tañ mı murğ-ı cân

 Anda ki Âdem gözleye gendüm Halîlu ’llâh ‘ades

09. Kankı nâkesdür kese senden ümîdin kahr ile

 Ni‘met-i lutfuñla çün mahrûm kalmaz hîç kes

10. Ravza-i ‘ışkuñda cân murğını ta‘lîm étmege

 Bu dokuz çarhı aña kılduñ müşebbek bir kafes

11. Ko senâ vü medhi gel ÂHÎ du‘â-yı Hazret ét

 Kim bu varlıkdan kamu ol bir du‘âdur saña bes

12. Dâyim el üstinde tut devlet du‘âsın ÂHİ’yâ

 Şükr ü minnet Râzık’a el yüze sürmekdür meges

 

https://ekitap.kulturturizm.gov.tr/Eklenti/10590,ahidivanimustafakacalinpdf.pdf?0