FÎ-MEDH-İ SULTÂNİ’L-İSLÂM BÂYEZÎD HÂN
 
Fâilâtün/Fâilâtün/Fâilâtün/Fâilün
1.Îd-i ekberdür cemâlün mutlak ey şems-i duhâ
Yüzüni görüp bugün kurbân olursam zî safâ
2. Halka-i zülfüne dil el sundugı her yanadan
Kıble-i erbâb-ı hâcetdür cemâlün Hüsrevâ[2]
3. Kaşlarun mihrabı içre oldugıçün kûşe-gîr
Secde-i şükr üzredür her sâat ol zülf-i dü-tâ
4. Dil nikâb-ı zülfün ile haddüni görüp didi
Kara atlas sanki beytu’l-lâha olmışdur kabâ
5. Tavf-ı kûyun hasretiyle cân viren uşşâkunun
Seba-i seyyâre hâk-i kabrin ider ider tûtyâ
6. Gam beyâbânında her dem seyl olur kanlu yaşum
Bulmaga hâr-ı mugaylân-ı gamun neşv ü nemâ
7. Kanlu yaşumla kapunda çihremi gören didi
Navdân-ı zer durur beytu’l-lâh üzre gûyiyâ
8. Kasd idüp kûyunda n’eyler gönlüme hûnî gözün
Hod bilür murg-ı Harem kanını dökmekdür hatâ
9. Tut ki hicrân-ı gamundur menzil-i bâd-ı semûm
Yüz çevirmek reh-revân-ı ışkun olur mı revâ
10. Nokta-i hatt-ı Harem midür benün yâ Rab aceb
Yâ hod ol seng-i siyeh midür k’ururlar yüz ana
11. Mescid ü büt-hâneden mihrâb kaşundur murâd
Kabe hakkıçün budur togru söz inan sen bana
12. Âteş-i ışk ile yandugı mahallende gönül
Key acebdür Kabeye varan ho yanmazdı oda
13. Bir büt-i mug-beççe fikrin komadı bende gönül
Şevk-ı rûz-ı îd-i vasl-ı hazret-i zıll-i Hudâ
14. Mihr-i çarh-ı saltanat yanî ki sultân Bâyezîd
Her kişiye Kabe-i ulyâ kapusıdur recâ
……..
22. Tavf-ı kûyun şevkına zeyn itdi şöyle mahmilin
Kâfile-sâlâr-ı encüm yanî kim bedr-i dücâ
23. Reh-revân-ı kûyunun ednâsı mîr-i kâfile
Bir gulâm-ı kemteründür Mısr u Şâma pâdşâ
24. Yol degüldür terk idüp gitmek harîm-i Mekkeyi
Yohsa sultân-ı Harem yüz süregelürdi sana
25. Rîk-i Mekke seng-diller gönlidür kûyunda kim
Âstânuna yüz urmışlardur olup hâk-i pâ
26. Her kaçan kim fikr-i hacc idem revân bî-çâre dil
Yönelür bin şevk ile fî’l-hâl işigünden yana
27. Yir ü gök pürdür tamâm âvâze-i lebbeyk ile
Hân-ı feyze lutfun idelden cihân halkın salâ
28. Kabe halk-ı âleme şöyle ziyâret-geh iken
Ger güci yitse gelürdi tavf-ı kûyundan yana
29. Her tarafdan şâhlar terk-i diyâr idüp gelür
Kabe-i kûyunda olmaga mücâvir sâlhâ
30. Bin sevâb-ı hacc u umre yazılur dîvânuma
Bir kez olursa müyesser kûyuna irmek şehâ
…………
34. Sehv ile andum mahallende hilâl ebrûları
Hâcet olmaz hod bilürdüm Kabede kıble-nümâ
35. Oldısa beytü’l-alâ dergâhuna erzândur
Atlas-ı zer-beft-i gerdûn sâye-bân-ı kibriyâ
36. Gerçi tenhâ Kabe nesl-i âdeme mahsûsdur
Kıble-gâh-ı ins ü cân olmışdur işigün şehâ
37. Oldı dergâh-ı refîun rub-ı meskûna sebeb
Hestî-i mamûre-i âlem nite k’ümmü’l-kurâ
38. Her dem inlerdüm ceres gibi hezârân derd ile
Şimdi hâcîlar gibi derd-i dile buldum devâ
39. Subh-dem görüp cemâlün Kabesin didi Münîr
İrdi hengâm-ı seher yanî gönül vakt-i duâ
40. Reh-revân-ı Kabe-i ulyâ özendükçe müdâm
Oldugınca ârzû huccâca nûr-ı Mustafâ
41. Kıble-gâh-ı âlem olsun tâ ebed âlî kapun
Her tarafdan şâhlar yüz süregelsün Hüsrevâ
 
Ersen ERSOY,  II. BAYEZİD DEVRİ ŞÂİRLERİNDEN MÜNÎRÎ HAYATI,ESERLERİ VE DÎVÂNI (İNCELEME-TENKİTLİ METİN) https://ekitap.kulturturizm.gov.tr/Eklenti/10631,muniripdf.pdf?0