Fikr-i ruhun ki dîdeden eşküm revân ider

 

Mef`ûlü fâ`ilâtü mefâ`îlü fâ`ilün

 

 1 Fikr-i ruhun ki dîdeden eşküm revân ider

 Bâg-ı hayâli bir suyı çok gülsitân ider

 2 Her yiri hûb olan güzelün nâzı çog olur

 Esbâb-ı hüsn sâhibini kâm-rân ider

 3 Aşık ne denlü olsa da bî-nâm ü bî-nişân

 Bir nâm ider hadengine dil-ber nişân ider

 4 Dil-ber odur ki hüsn ü bahâ kıymetin bile

 Ol hâce-i cemâl sakınsun ziyân ider

 5 Yahyâ o mâha ta`nı ko nâ-mihribân diyü

 Te`sîr-i aşk bir gün anı mihribân ider

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147