Firâkuñdur yaşum la‘l-i Bedahşân olmaga bâ‘is

 

 

148

Mefâ‘îlün/ Mefâ‘îlün/ Mefâ‘îlün/ Mefâ‘îlün

 

Firâkuñdur yaşum la‘l-i Bedahşân olmaga bâ‘is

Gam-ı şemşîr-i hecrüñdür ciger kan olmaga bâ‘is

Nihâl-i nahl-ı kaddüñden cüdâ oldugum olmışdur

Elifler sînede serv-i hırâmân olmaga bâ‘is

Gam-ı gülzâr-ı hüsnüñdür benüm ey verd-i handânum

Baña bülbül-sıfat her demde nâlân olmaga bâ‘is

Sehergeh şeb-nem-i eşküm düşürse olur ol gonce

Gülistân-ı melâhat içre handân olmaga bâ‘is

Mey-i eşküm dökilse bezm-i gamda n’ola ey Ravzî

O mest-i nâz olupdur baña giryân olmaga bâ‘is

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009