mefâ’îlün mefâ’îlün mefâ’îlün mefâ’îlün
1 Gam-ı cânândan ahbâb-ı dil-i vîrânumuz vardur
Bizüm de hâlümüzce yârümüz yârânumuz vardur
2 Hayâl-i kâmet-i bâlâ-nihâlâna olaldan cây
Kenâr-ı cûy-bâr-ı dilde nahlistânumuz vardur
3 Atı oynagı bir yerdür efendim şeh-süvârânuñ
Karîb-i hânemüzde bir büyük meydânumuz vardur
4 Dahi bir beyti cânâ olmamış zannum bu manzûruñ
Senüñ vasfuñda on beş cüz kadar dîvânumuz vardur
5 Dökerse dîde bir yaş dilde biñ gevher olur peydâ
Bizüm bârân-ı eşke mevsim-i neysânumuz vardur
6 Buyur gâhîce şâhum hâne-i Pertev diyüp geçme
Bizüm de hâlümüzce yârumuz yârânumuz vardur
Dr. Ekrem Bektaş, MUVAKKİT-ZÂDE MUHAMMED PERTEV DÎVÂNI, Malatya-2007, https://ekitap.kulturturizm.gov.tr/Eklenti/10630,muvakkitzade-pertevpdf.pdf?0