Gazel Gamze-i bîgâneye dil âşinâ olmak diler
Gazel
Gamze-i bîgâneye dil âşinâ olmak diler
Halkdan âhû-sıfat vahşet-fezâ olmak diler
Sâye-veş pâ-mâl olup üftâden ey serv-i ümîd
Her kademde hâk-i pâye çehre-sâ olmak diler
İktizâ-yı hikmet üzre selb-i akl eyler kazâ
Yoksa kim pâ-beste-i dâru’ş-şifâ olmak diler
Ân-be-ân dûd-ı siyeh-veş kâküli pür-pîç olup
Fark-ı uşşâka belâ-ender-belâ olmak diler
Dîde-i pür-hûnunı âşık edip gül-gûn kadeh
Subh-dem hem-meşreb-i ehl-i safâ olmak diler
Şebnem-efşânî-i çeşmimden olup âhım vezân
Gül-sitân-ı hüsnine bâd-ı sabâ olmak diler
Devr ider bezm-i tehî-destîde encâmı çü câm
Kim ki bir dem hem-dem-i ehl-i hevâ olmak diler
Kilk-i Hikmet vasf-ı rûyunda sarîr-i germ ile
Bâg-ı nazma bülbül-i âteş-nevâ olmak diler
Ârif Hikmet (1283). Dîvân-ı Hikmet. İstanbul: Matbaa-i Âmire. 135.
