GAZEL-İ SÜHEYLÎ TAHMÎS-İ NÂZIM
 
Mefâ`îlün Mefâ`îlün Mefâ`îlün Mefâ`îlün
I
O miskîn hâllerle bâğ-ı ruhsârı Hutenlenmiş
Leb-i la`li çemenlenmiş `izârı yâsemenlenmiş
N`ola olsa hezâr-ı dil o gülşende vatanlanmış
Açılmış tal`at-i nesrîni hakkâ nesterenlenmiş
Bülend olmış nihâl-i hoş-hırâmı nârvenlenmiş
II
İrüp `ahd-i cüvânı zâhir olmış anda sun`-ı Hak
`Aceb ra`nâlıgı var câme-i sebzine müstagrak
Bedenlenmiş tarâvet baglamış ol serv-kadd el-hak
Bahâr-ı hüsni virmiş gülşen-i dîdârına revnak
Yeşiller geymiş ol nahl-i semen-sîmâ çemenlenmiş
III
Dirîgâ çeşm-i `uşşâka görinmez ol perî-sûret
Varup her kadrini bilmezler ile eylemiş ülfet
Takılmış yanına birkaç rakîb-i dîv-i bed-sîret
`Aceb mi itmese şimden girü hâl ehline ragbet
Erâzil kısmına olmış mukârin Ehrimenlenmiş
IV
Dimiş ol tûtî-i hüsn ü melâhat düşmen-i zâğa
Virenler nakd-i cân gelsün metâ`-ı vaslum almaga
Bu sözden lâle-i hûnîn kefen-veş başdan ayağa
Vücûdın kablamış kanlu yaş ile penbe-i dâğa
Dil-i şûrîde gûyâ ölmesin bilmiş kefenlenmiş
V
Yine kimlerle Nâmî bilmem ol hûnî refîk olmış
Nigâh-ı gamze-i hûn-rîzi kattâ`-ı tarîk olmış
Gül-i ruhsârı güllâb-ı `arak içre garîk olmış
Kızarmış tâb-ı mülden çehre-i alı `akîk olmış
Yine içmiş Süheylî ol dür-i yektâ Yemenlenmiş
 
Yard. Doç. Dr. Ahmet YENİKALE  AHMET NÂMÎ  DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ