Gazel ü Tahmis-i Vecdî

Gazel ü Tahmis-i Vecdî

Fe’ilâtün Fe’ilâtün Fe’ilâtün Fe’ilün

1 Dir iseñ olmayasın dünyede zâr ü mehcûr

Nûr-ı pâk-i ehadiyyetten ire kalbüñe nûr

Gezme sahrâ vü beyâbânı misâl-i zenbûr

Künc-i vahdetde dilâ sâkin olup eyle huzûr

Bûmveş çıkma sakın başuña üşer vahş u tuyûr

2 Her kişi gitse gerek kûy-ı fenânuñ rehine

Ol sühâ gibi urup çarh-ı bekânuñ mehine

Armaganuñ ne ola ol iki ‘âlem şehine

Turmayup gitmedeyüz makbere menzilgehine

Yolumuz râh-ı fenâ yoldaşımuz ehl-i kubur

3 ‘Ömr pâyâna irişdi niçe bir tûl-ı emel

Sa’y kıl eyleyigör mûcib-i ‘ilm ile ‘amel

Uyma şeytâna hüdâ yolunı gözle berü gel

Bizi ugrulayuben yire gömer düzd-i ecel

İletür zîr-i zemîne nite kim dâneyi mûr

4 Niçe bir dâr-ı fenâda çekesin hicrânı

‘Âzim-i râh-ı bekâ ol koy a bu vîrânı

İntibâh üzre olup aç gözüñ uyar cânı

Ol ki gafletdedürür ölmiş anuñ akrânı

Beñzer ol yolcuya kim gitdi refîki ol uyur

5 Yâr dîdârını görmek diler iseñ yârin

Sarf kıl yolına gel nakd-i vücûduñ varın

Râygân bulmak olur mı kişi hîç dildârın

Vecdi her kûyına varan göremez dîdârın

Çok kişi hacc ider ü degme biri görmez nûr

Filibeli Dervişzade Abdurrahman Vecdi Kimdir

Prof. Dr. Hasan KAVRUK, Dr. Bahir SELÇUK, FİLİBELİ VECDÎ ve DÎVÂN’I (METİN-DİZİN), © T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3366 ,MALATYA 2009