Geçerken zîr-i kâşâneñden itdüm âh tuyduñ mı
29.07.2017
Mefâ‘îlün Mefâ‘îlün Mefâ‘îlün Mefâ‘îlün
1. Geçerken zîr-i kâşâneñden itdüm âh tuyduñ mı
Efendüm korkaram uykuda idüñ âh tuyduñ mı
2. Bu şeb tâ vardum bülbül gibi semte figân itdüm
Seni uyardum itdüm nâle-i nâ-gâh tuyduñ mı
3. Nezâketle varup bir bûsede aldum yañaguñdan
Tehevvür itme söyle hasbeten-li’llâh tuyduñ mı
4. Ben olmuşdum harâb-ender-harâb neş’e-i şevkuñ
Sen olmaduñ mı hºâb-ı nâzdan âgâh tuyduñ mı
5. Giderken bâdveş döndüm girifte-pây-ı bî-tâba
Bulınmaz oldı hayretden sürâg-ı râh tuyduñ mı
6. Rakîbe râst geldüm zîr-i kâşâneñde gör bahtı
Selâm virdüm yarım agızla bi’l-ikrâh tuyduñ mı
7.7a Segân-ı kûçe-bend-i semtüñe itdüm müdârâlar
Tevâzu‘larla itdüm hayli ey-va’llâh tuyduñ mı
8. Zenehdânuñ hayâliyle dönüşde bir ser-i çâha
İlişdi pâyum oldum Yûsuf-ender-câh tuyduñ mı
9. Senüñ seng-i ser-i kûyuñla dögdüm sîne-i çâküm
Girîbân itdi dâmâna meded eyvâh tuyduñ mı
10. Yüzüm sürdüm gehî hâk-i siyâha ki göge tutdum
Gögerdi müştlerden sîne-i cângâh tuyduñ mı
11. Dögündüm tâşlarla pîş-i kasr-ı âb-gûnuñda
Görüp güldi rakîb-i bî-şerem kahkâh tuyduñ mı
12. Tavâf-ı Ka‘be-i kûyuñ müyesser kıldı Kânîye
Hele ölmezden evvel Hazret-i Allâh tuyduñ mı
Dr. İlyas YAZAR , K Â N Î D Î V Â N I, Ankara 2012
