mefāʿīlün mefāʿīlün mefāʿīlün mefāʿīlün
Gel ey ġamze kerem eyle raḳīb·i pür-fitenden geç
Beni anuñla bir itme yā andan geç yā benden geç
Dilā cān ise maḳṣūdūñ var ol ġonca-dehenden ṣor
Yā ẖōd laʿl·i lebi ise murādūñ mey diyenden geç
Kemān ebrūlaruña incinüb peykānuña geçdüm
Gel ey tīr·i müje biˀllāhi luṭf eyle geçenden geç
Gülistān mevsimi geldi nidersin çār dīvārı
Ruẖ·i cānāna ʿazm eyle göñül ḳayd·ı bedenden geç
Ṣanevber ayaġuñ öpmege Ṭūbā gibi baş egmiş
Ṣu gibi bir kez ey serv·i revān ṣaḥn·ı çemenden geç
Didüm rūz·i ezel oldum bu bezm·i ḥüsne pervāne
Gülüb didi ki gelmedi bu bezme kimse senden geç
Levend olduñsa baş egme Necātī vaẓʿ u destāra
Özüñ meydān·ı ʿışḳ içre şehīd eyle kefenden geç
Ali Nihad Tarlan, Necāti Divanı -