Gel öğren ‘ışkı yârâ kaşlarıñdan nice san‘atdür

 

Mefâ‘îlün Mefâ‘îlün Mefâ‘îlün Mefâ‘îlün

 

1 Gel öğren ‘ışkı yârâ kaşlarıñdan nice san‘atdür

İşi birbirine dâyim iki başdan muhabbetdür

2 Firâkuñ acısın ş’ol deñlü gördüm kim aña nisbet

Efendi kıssa-i Ferhâd bir şîrîn hikâyetdür

3 Şehâ seng-i havâdisden benüm göñlüm yıkılmışdur

Gelen anuñ sadâsıdur sanurlar âh-ı hasretdür

4 Lebüñ hatt-ı dehânuñda sanasın ey yüzi mushaf

Konılmış sûre-i Kevserde surh ile bir âyetdür

5 Bu gurbet zahmetinden Sun‘iyi kurtarmaga ey dil

Eğer gelmezse sag olsun ecel hicrâna minnetdür

 

Gelibolulu Sun’î (1486- 1534) Hayatı..

 

YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep