Gel temâşâ kıl ne söyler ‘âşık-ı divâneler
06.06.2016
Fâ‘ilâtün Fâ‘ilâtün Fâ‘ilâtün Fâ‘ilün
1 Gel temâşâ kıl ne söyler ‘âşık-ı divâneler
Cür‘a-i Seb‘u’l-mesânîden içen mestâneler
2 Mâsivâ renginden aslâ komamış nâm ü nişân
Vahdetiñ deryâsına gavvâs olan şâhâneler
3 On sekiz biñ ‘âlemi terk eylemiş öñden soña
Cümle ‘ilmiñ ma‘nisi bahrındaki dürdâneler
4 Küllî varlık mahv olıncak gayrı kalmaz arada
Küntü kenze mazhar olur sâdık-ı merdâneler
5 İşiden innî ene’llâhdan hıtâbı dem-be-dem
Sem‘ine girmez anuñ hiç gayrıdan efsâneler
6 Gizli râzı gün gibi fâş eyler ol bî-ihtiyâr
Gün gibi günden ‘ayân olup gelen hum-hâneler
7 Mahrem-i zât-ı İlâhîsin bugün hakka’l-yakîn
Ey Sinân Ümmî ne bilsün sırrıñı bî-gâneler
Doç. Dr. A. Azmi BİLGİN,ÜMMÎ SİNAN DİVANI,K.veTurzm.Bak.,ekitap.kulturturizm.gov.tr
