I

Gerçi feryâd-ı şerer-rîzi degüldür bî-eser

Virmesün yek-dem velî âyîne-i kalbe keder

Gülşen-i ikbâledür hayr-ı du‘âsı her seher

Nâle eyler kûyuna itse sabâ dahı güzer

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

II

Jâle-i bî-rûya yüz virdün dilin hûn eyledün

Hoş görüp hârı garîbi hâr u mahzûn eyledün

Ragmına gûyâ ki hayl-i zâgı memnûn eyledün

Zâr idüp ol derd-mendi cevre kânûn eyledün

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

 III

Dûd-ı âhın câdû-yı hicrân itmiş çeşm-i bend

Nâle-i pey-der-peyi gûşına olmış seng ü sed

Bî-haberdür kendiden gelmez elinden nîk ü bed

Ol güzel başun içün itme deründen anı red

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

IV

Âşiyânı hâr-ı zâr u âşinâsı hâr hâr

Düşmen-i ârâm-ı cânı devr-i eyyâm-ı bahar

Zâr zâr olmak ana düşmez var iken bûm u hâr

İtmesün şâhâne-vâr ol bî-günâhı böyle zâr

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

V

Hârdur âgûşa evvel cür’et izhâr eyleyen

Hârdur âhır hezârun cânına kâr eyleyen

Hârdur pîrâmenün dîvâr-ı âzâr eyleyen

Hârdur gül-çîn-i çeşmi pür-gil ü târ eyleyen

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

VI

Hırz-ı gül-zâr-ı letâfetdür enîni bülbülün

Vird-i eshâr-ı sa‘âdetdür hanîni bülbülün

Levh-ı erkâm-ı sadâkatdür cebîni bülbülün 

Bî-gam-ı hâr-ı hıyânetdür zemîni bülbülün

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

VII

Kanda ol bî-çâre kanda ârzû-yı müdde‘â

Hâr-ı ser-tîz-i cefâ hod-dûr-bâş-ı müntehâ

Şehper-i fursat esîr-i dâm-ı gîrâ-yı rızâ

Tâb-ı hüsnün şu‘le-i pervâne-i çeşm-i hayâ

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

VIII

Ser-güzeştin dâsitân-ı âlem itdün subh u şâm

Nukl-i bezm-i ibret itdi mâcerâsın hâs u âm

Eylemiş nakş-ı tegâfül kâr-ı ümmîdin temâm

Arz-ı hâl-i hasretündür ancak aksâ-yı merâm

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

IX

Bülbülündür gülşenünde Sâkıb-ı hûn-âba rîz

Gûş idüp agyârı itme cânını cây-ı sitîz

Yohsa feryâd ile eyler kûyunı pür-rest-hîz 

Deşt-i mahşerde bulınmaz dest-i âhından girîz

Bülbül-i şûrîdenün yokdur ziyânı kıl kadar

Sen hemân ey gonca-i iffet dikenden kıl hazer

 

Doç. Dr. AHMET ARI ,Mevlevîlikte Bir Hanedanlık Kurucusu SÂKIB DEDE VE DÎVÂNI, https://ekitap.kulturturizm.gov.tr/Eklenti/10645,sakibdededivanigirispdf.pdf?0