Giyersin kırmızı câme libâs-ı erguvân üzre

Mefâ’îlün Mefâ’îlün Mefâ’îlün Mefâ’îlün

1 Giyersin kırmızı câme libâs-ı erguvân üzre

Helâk eylersin ‘uşşâkı idersin katı kan üzre

2 Meger sultânı-ı magrib şark ili fethin buyurmışdur

Atılmış top-ı mihr ü meh kevâkib hep kırân üzre

3 Zirihlerdür girihler migfer-i sîmin habâbıdur

Sabâ rezm âletin resm eylemiş âb-ı revân üzre

4 Göyindürdüñ ‘Acem mülkin söyindürdüñ ocagın hem

Yalın kılıç havâle itdüñ Âzerbaycan üzre

5 Kırımzı lâleler şâh üzre sahralarda zeyn olmış

Dikilmiş sürh-serler kellesi sandum sinân üzre

6 Gözin açdurmadı gerd-i sipâhuñ nat’-ı ‘âlemde

Yeter böyle belâ at sürme şâh-ı Isfahân üzre

7 ‘Acem mülketleri zîr-i nigîn-i hükmüñ olmışdur

Elüñde oynadursın hâtemâsâ bir benân üzre

8 Taşırgatma kuluñ şâh-ı Refâvız karşuña turmaz

Yeter çîn-i cebînüñ çekme ‘asker bir cebân üzre

9 ‘Acem serdârı tîrüñ korhusından uyhuya varmaz

Meger kim baş koya bir kez kemîn içre kemân üzre

10 Nizâm-ı mülk ü millet sâye-i Hak Hân Murâd ol kim

Senâ vü ‘izzeti vâcibdürür pîr ü cüvân üzre

11 Saña lâzım du’â-i şâh-ı dîn-perverdür ey Vecdî

İcâbetler hudâvend-i zemîn ü âsmân üzre

Filibeli Dervişzade Abdurrahman Vecdi Kimdir

Prof. Dr. Hasan KAVRUK, Dr. Bahir SELÇUK, FİLİBELİ VECDÎ ve DÎVÂN’I (METİN-DİZİN), © T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3366 ,MALATYA 2009