Gönlümi yıkdun yine cevri firâvân eyledün

 

222

- . - - / - . - - /- . - - /- . –

 

Gönlümi yıkdun yine cevri firâvân eyledün

Pâdişâhum zulm ile bir şehri vîrân eyledün

Âh kim unutmışam andurdun ey gam sen benüm

Fürkatin yâd eyleyüp ‘aklum perişân eyledün

Ehl-i bezmün üstine açıldı cennet revzeni

Mest olup ey hûri çün çâk-i girîbân eyledün

Virdi bûsen ey tabîb-i cân dile tâze hayât

Bir ölümlü hastanun derdine dermân eyledün

Bir cefân içün sana yüz bin du’â eyler gönül

Ol fakîre dostum lutf itdün ihsân eyledün

Çün yöneldün kûy-ı dildâra Revânî seyr içün

Bülbül-i şûrîdesin ‘azm-i gülistân eyledün

 

Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8