Gönül mir'âti kim sad-pâre-i dest-i celâlündür

 

Mefâ`îlün mefâ`îlün mefâ`îlün mefâ`îlün

 

 1 Gönül mir'âti kim sad-pâre-i dest-i celâlündür

 Yine her pâresine cilve-ger baksan cemâlündür

 2 Cemâl-i bâ-kemâlündür sevâd-ı çeşmünün nûrı

 Süveydâ-yı dili `aşk ehlinün sevdâ-yı hâlündür

 3 Hayâlünde eger eglenmeyeydi hâl müşkildi

 Belâ küncinde kim eglencemüz cânâ hayâlündür

 4 Kosan ârâm itmez kürsî-i zerrîn-i hurşîde

 Mahabbet reh-güzârında gönül kim pây-mâlündür

 5 Ser-i ehl-i mecâz olan belâ-keş Kays'un ahvâli

 Hakîkatde nazar olunsa Yahyâ hasb-i hâlündür

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147