Gör kadd-i yâri serv-i çeman söylerim sana

Gör kadd-i yâri serv-i çeman söylerim sana

Bak ol dehâna râz-ı nihan söylerim sana

Sorma peyâm-ı la‘lini peymâne duymasın

Ey dil tehâlük etme aman söylerim sana

Ben şâ‘irim o kâmet-i mevzûnu doğrusu

Sevmem desem de belki yalan söylerim sana

Vardır huzûra söyleyecek bir sözüm onu

A‘da kaçan uyur o zaman söylerim sana

Söylenmez ol perî ile seyr-i Hisârımız

Zann etme ey dil onu heman söylerim sana

Hamdır dü zülfi zülfe-veş onunla bil hemân

Ey bâd-ı subh işte nişan söylerim sana

Eylerse bana dahı nazar ol hidiv-i ah

Hem-çün Nedîm sihr ü beyan söylerim sana

Seyr eyledikçe dâiresin der sipihre mihr

İzz ü vakâr u haşmet ü şan söylerim sana

Feyz-i nesîm-i lutfu ile gülsitanda gül

Gûyâ deyüp durur ki heman söylerim sana

Tâ cebhen üzre nakş ederim vasfın âkıbet

Ey âftâb işte ıyan söylerim sana

Mirrîh heybetini görüp der pesend ile

Şekl-i melekde şîr-i jiyan söylerim sana

Ey meh rikâbı ol da gör ikbâli ben bunu

Her vakt u her zamân u her an söylerim sana

Hiç bir nişâne yok o miyân u dehandan

Âgâh olursam ey dil ü can söylerim sana

Bir kaşı yaya çille-keş-i âh imiş Nedîm

Ammâ o şûhu bâri cüvan söylerim sana

Prof. Dr Muhsin Macit, Nedim Divanı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ, KÜLTÜR ESERLERİ 511

Nedim Hayatı ve Edebi Kişiliği