Mefâ`îlün mefâ`îlün mefâ`îlün mefâ`îlün

 

 1 Görince hod vücûdum mahv olur kalmaz nişân benden

 Ne gördi kaçdı âyâ ol meh-i nâ-mihribân benden

 2 Ne yüzden oldı ise mâ-cerâ-yı çeşmi arz eyler

 Varur her gün ayagın tozına eşk-i revân benden

 3 Ruhı yâdıyla dil-dârun sabâh olunca âh itdüm

 Harîfâne geçindük şem` dil-berden duhân benden

 4 Seni çün zülfi bend itdi biraz andan da feryâd it

 Nice yıldur idersin ey dil-i şeydâ figân benden

 5 Leb-i can-bahşını emdirdi tut kim kasd-ı cân eyler

 Ne virdi alımaz Yahyâ `aceb ol bî-emân benden

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147