9

Mefâ‘îlün Mefâ‘îlün Mefâ‘îlün Mefâ‘îlün

 

1 Gözüm izüñ kumıyla yarın idem şîşe-i sâ‘at

Görem rûz-ı kıyâmet mi uzundur yâ şeb-i hasret

2 Dilâ câm-ı muhabbetde ezelden böyledür hâlet

Şarâbı zehrdür anuñ eceldür aña keyfiyyet

3 Senüñle olan ahvâlüm iderler halka hep tasvîr

Şehâ Şîrîn ü Ferhâdı idüp nakkâşlar sûret

4 Bi-hamdi’llâh beni tenhâ komaz derd ü belâ ü gam

İderler hücre-i dilde gelüp her gice cem‘iyyet

5 ‘Adûdan yaña döndürdi yüzin hey dostlar dilber

Dirîgâ n’eyleyem ben düşmene yüz tutdı çün devlet

6 Hatuñ geldi n’ola senden temennâ-yı visâl itsem

Benefşe çün gül ile cem‘ ola makbûl olur hâcet

7 Katı meşhûr idüñ ‘ışk ile âhir bir perî sevdüñ

Görinmez âfete ugrattı Sun‘î gör seni şöhret

 

Gelibolulu Sun’î (1486- 1534) Hayatı..

 

YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep