276
Mefâ‘ilün Fe‘ilâtün Mefâ‘ilün Fe‘ilün
1 Gubâr-ı âyîne-i hâtırı safâ bilürüz
Şikestî-i dil-i zârı mûmyâ bilürüz
2 Varınca bezm-i meye irtikâba ‘âr iderüz
Egerçi biz dahi zâhid kadar riyâ bilürüz
3 Gürisnelikle helâk oldı toymadı mâla
Kimi ki devlete biz germ-iştihâ bilürüz
4 Gam-ı nihân buluruz mey-keşân-ı hurremde
Savâb-dîdini biz ‘âlemüŋ hatâ bilürüz
5 Sitem ki şîve-i bîgâneden çekilmişdür
Garîb-vâruz anı lutf-âşinâ bilürüz
6 Çıkarsa bildügümüz gibi rû-siyehlikdür
Ki sâde-rûlaruŋ encâmını fenâ bilürüz
7 Tamâm olmag ile ‘ömr-i şem‘ümüz SÂKIB
Biz ibtidâ-yı şeb-i hecri intihâ bilürüz
Dr. Mehmet KIRBIYIK, KÂTİB-ZÂDE SÂKIB DÎVÂNI, https://ekitap.kulturturizm.gov.tr/Eklenti/10622,katibzade-sakibpdf.pdf?0