Fâ`ilâtün Fâ`ilâtün Fâ`ilâtün Fâ`ilün

 

1 Hâkim-i hüsne göñül cân nakdini rüşvet virür

 Vasluñı hükm eyleyüp hattuñ hemân hüccet virür

2 Cân virürdüm yolına makbûli olmaz korkaram

 Katlüm isterdüm velî kattâlüme zahmet virür

3 Kâr-ı Ferhâdı begenmez niçeler yetmez mi kim

 Kûh-ı gamda itdügi `âşıklara gayret virür

4 Añmañ eyyâm-ı firâkı işidenlerden ırak

 Adın işitmek ne deñlü âdeme heybet virür

5 Nazm-ı şîrînüm okursam şevk-i vasluñla n’ola

 Eyle dirler dostum tuz ni`mete lezzet virür

6 Bengîler hayrân olurdı ger temâşâ kılsalar

 Baña esrâr-ı leb-i dil-ber ne keyfiyyet virür

7 Hâlden hâlî degül nazm-ı selef ammâ benüm

 Ey Ziyâ’î her sözüm çok şevk ü çok hâlet virür

 

 

Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ