HÂLÂ ŞEYHÜ’L-İSLÂM EBÛ SA‘ÎD EFENDİ HAZRETLERİNE VERİLMİŞDÜR

 

Remel: Fâ‘ilâtün fâ‘ilâtün fâ‘ilâtün fâ‘ilün

– + – – / – + – – / – + – – / – + –

 

01. Biz ki bezm-i gamda câm-ı zer-nigâra mâliküz

Rind-i Cem-âyîn-i ‘aşkuz yâdigâra mâliküz

02. Başumuzda âfitâb-ı zât-ı kürsî tâze dağ

Şâh-ı ‘aşkuz zer-külâh-ı şu‘le-dâra [mâliküz]

03. Sînemüz gencîne-i esrâr-ı hikmetdür bizüm

Bir dükenmez dilde genc-i bî-şümâra mâliküz

04. Nâkıs olmaz her zamân efkârumuz nakd etmişüz

Ceyb-i dilde dirhem-i kâmil-‘ayâra mâliküz

05. Lutf-ı Hak′la re’yümüzde etmezüz hergiz hatâ

Dil gibi bir feylesôf-ı rûzgâra mâliküz

06. Dâyimâ cûş u hurûşı eksük olmaz âh-ıla

‘Aşk derler dilde bahr-ı bî-kenâra mâliküz

07. Tıfl-ı dil derler gül-i bî-hâra mâyil olmışuz

Rûz u şeb egler bizi ol gül-‘izâra [mâliküz]

08. Katre-i eşkin reh-i dildârına rîzân eder

Nergis-âsâ dîde-i gevher-nisâra mâliküz

09. Gûş-ı gerdûna Beyânî gûşvâr etsek olur

Kân-ı fikr-i dilde la‘l-i âb-dâra mâliküz

10. ‘Arz-ı tab‘-ı Hazret-i Müftî-i ‘âlem etmege

 Gevher-i pâkîze-i kân-i‘tibâra mâliküz

11. Hâk-i pâyına sezâ-vâr-ı nisâr olsa n′ola

Silk-i evsafında dürr-i şâhvâra mâliküz

 

5. 64a

.

71

12. Bahr-ı bî-pâyân-ı ihsân reşha-rîz-i bâğ-ı cûd

Ebr-i nîsân-ı kerem re’fet-şi‘âra mâliküz

13. Gerd-i hâk-i zillet olmakdan halâs olsak n′ola

Cûy-ı bâğ-ı rif‘at ol fahr-ı kibâra [mâliküz]

14. Hall olursa n′ola dilde ‘ukde-i efkârumuz

Böyle bir hallâl-i Keşşâf-iştihâra [mâliküz]

15. Etmezüz cevr-i le’îmân-ı zamân endîşesin

Ol cihân-ı fazl u takvâ dâd-kâra [mâliküz]

16. Düşmezüz endîşe-i teşvîşe hem gam çekmezüz

İltifâtı gibi zîrâ gam-güsâra mâliküz

17. Âsitânı n′ola olsa maksem-i erzâk-ı halk

Bende-perver ol hümâm-ı kâm-kâra mâliküz

18. Dâyirüz kutb-ı murâdı âsitânında anuñ

Hamdü lillâh dergeh-i devlet-medâra mâliküz

19. Devletinde etmezüz gerdûna ‘arz-ı ihtiyâc

Kâm-bahş ol dâver-i ‘âlî-tebâra mâliküz

20. N′içün olmazuz cefâ-yı çarhdan âsûde-dil

Dâd-ger ol seyyid-i sa‘d-iftihâra mâliküz

21. Sübha-gerdân-ı senâ vü hamd ü şükr olsak olur

Böyle bir müftî-i Dârâ-iktidâra mâliküz

22. Pes n′içün şükr eyleyüp dâyim du‘âsın etmezüz

Çün münâcât-ı cenâb-ı Kirdigâra mâliküz

23. Gonçalarla gülbün-i zâtın Hudâ hıfz eylesün

Virdümüz[dür] bu du‘â her dem bu kâra mâliküz

 

Fatih BAŞPINAR, BEYÂNÎ [ö. 1075/1664-5] DÎVÂN İnceleme – Metin, https://ekitap.kulturturizm.gov.tr/Eklenti/10598,beyani-apdf.pdf?0