Fe`ilâtün fe`ilâtün fe`ilâtün fe`ilün
1 Handeye ol dehen-i tengde çün yok imkân
Bir tebessüm de mi mümkin degül ey gonce-dehân
2 Gayri ezhâr gül ü lâleye hem-reng olımaz
Sâgar-ı işreti çün anlara sunmuş devrân
3 Bülbüle aşk-ı gülün `âkibetin gösterdi
Gâh tîr itdi sabâ şâh-ı güli gâhi kemân
4 Şimdilik bülbül ü gül nâz u niyâzı komasun
Bu safâ demlerini, bulmayalar nice zamân
5 Bu gelür hâtıra ol yâr ile hâlün Yahyâ
Bir kitâb eyleyesin nâmı ola pîr ü cevân
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147