Harâb-ender-harâb sâgar-ı ser-şârıñam sâkî

30.07.2017

 
Mefâ‘îlün Mefâ‘îlün Mefâ‘îlün Mefâ‘îlün
 
1. Harâb-ender-harâb sâgar-ı ser-şârıñam sâkî
Misâl-i zerre mahv-ı pertev-i ruhsârıñam sâkî
2. Degül peymâne-keşlik meşrebüm mey-hânede ammâ
Helâk-i neş’e-i zehr-âbe-i âzârıñam sâkî
3. Yed-i beyzâ da olsa pây-ı humda baña el virmez
Yetiş bir ayak evvel hasret-i dîdârıñam sâkî
4. Ne savt-ı kulkul-i mînâ ne hây-ı hûy-ı mey-hºârân
Mutayyeb-kerde-i güftâr-ı şevk-âsârıñam sâkî
5. Nikâb-ı şermi ref‘ it vech-i pâk-i duhter-i rezden
Beni bî-gâne sanma mahrem-i esrârıñam sâkî
6. Talebkâr-ı neşât-ı bâde-i gül-gûnıñam sâkî
Hemân bir sâgar-ı leb-rîz ile memnûnıñam sâkî
7. N’ola ser-şâr-ı sahbâ-yı sürûr olsam bu demlerde
Humâr-ı hasretüñle hayli dem mahzûnıñam sâkî
8. Kalursa böyle bezm-i ‘ayş-ı ‘işret her dem âmâde
Senüñ ben rûz-ı mahşerde dahı medyûnıñam sâkî
9. Siyeh mest-i şarâb-ı ‘ışk-ı Leylî olmadum ammâ
Seni gördüm yitirdüm ‘aklımı Mecnûnıñam sâkî
10. Miyân-ı bezm-i mey-hºârân-ı ‘ışk-ı şevke baş koydum
Dil-i Kânî gibi ben de senüñ meftûnıñam sâkî
 
Dr. İlyas YAZAR , K Â N Î D Î V Â N I, Ankara 2012
 

Yorum Yapmak için Kayıt Olun veya Giriş Yapın

Yorumlar