Gazel
Harâb olur bu kasr ey dil binâsından eser kalmaz
Yanar düpdüz bu nahlistân-ı mihnet huşk ü ter kalmaz
Zücâc-ı dil gibi bir gün sınur bu sâgar-ı minâ
Dökilür bâdesi kânûn-ı bezminde şerer kalmaz
Bu bezmün bozılur tertîbi erbâbı gider bir bir
Şikest olur surâhîsi tolu peymâneler kalmaz
Bu mey-hâne olur hâk-ile yeksân bir gün ey sâki
Perişân olur ehl-i ‘işret ana bir keder kalmaz
Cem-i devrân isen de dehre zinhâr i‘timâd etme
Gurûrı ko sakın şâhâ elünde câm-ı zer kalmaz
Hemân def‘-i mevâni‘ eyle ‘azm et kûy-ı dil-dâra
Bilürsin yol erine bir tarîk-ıla sefer kalmaz
Beyânî yıkılur bir gün bu deyr-i dîr-pâ ol gün
Ser-â-ser mâsivâ fâni olur cinn ü beşer kalmaz
Başpınar, Fatih (2008). 17. Yüzyıl Şairlerinden Beyânî’nin Divan’ı, İnceleme-Tenkitli Metin. Doktora Tezi. İstanbul: Marmara Ünv. 337-338.
Fatih BAŞPINAR, BEYÂNÎ [ö. 1075/1664-5] DÎVÂN İnceleme – Metin, https://ekitap.kulturturizm.gov.tr/Eklenti/10598,beyani-apdf.pdf?0