GAZEL
 
 Hayret alur aklumı baksam gözine kaşına
 Sad hezârân âferîn şol sûretüñ nakkâşına
 
 Bâdede çün cilveger gördi cemâlini Hak’uñ
 Zâhidâ ta’n eyleme deyr-i fenâ kallâşına
 
 Merkadi taşını Mecnûn’uñ alâmet sanmañuz
 Seng-i mihnetdür ki yagdurdı zamâne başına
 
 Başumuñ üstinde şerh eyler zebân-ı hâldür
 Cevr ile cân virdügüm baksañ mezârum taşına
 
 Tâb-ı mihnetden olurdı kûr çeşmüm çeşmesi
 Hûn-ı dilden ger meded olmasa gözüm yaşına
 
 İşidüp benden rumûz-ı ışkı Ferhâd itdi fâş
 Sırrını olmaz imiş açmak kişi yoldaşına
 
 Kim saña yavuz nazar eylerse mest-i nâz olup
 Bezmde hançer çeküp didüñ ki degdi yaşına
 
 Aç nikâbın yüzüñüñ kim hüsn-i ruhsârın görüp
 Gün cemâlüñ hasretinden bulud ile yaşına
 
 Varını itdi Hayâlî şâh ayagına nisâr
 Âferîn sad âferîn şol tab’-ı gevher-pâşına
 
(Köksal 2012, s. 2242)