HAYRÎ-NÂME'den
03.04.2016
HAYRÎ-NÂME'den
Matlab-ı dagdaga-yı paşayî
Ey tırâzende-i ikbâl-i ebed
V'ey firâzende-i kânûn-ı hıred
Mu'tedil olmağ içün cümle umûr
Lâzım a'mâl-i terâzû-yı şu'ûr
Budur âsûdegî-i cûy-ı murâd
Cereyân ede ta'absuz irâd
Vezne çek masrafın îrâdın ile
Râhat ol ehl ile evlâdın ile
Hak verip vâsi' olursa hâlin
İddihâr eyle biraz emvâlin
Def'aten etme tehî hemyânın
Nice bâzîçesi var dünyânın
Fazla mâl olmayıcak yapma binâ
Eyleme mâlını bîhûde hebâ
Olmasın masrafın ol denlü füzûn
Ki zarûrî olasın zâr u zebûn
(.......)
Devlet âheste gerekdür cârî
Katı memdûh degül ser-şârî
İki mâsûre su etse cereyân
Hânede cümleyi eyler reyyân
Toldurur bâğı egerçi seyl-âb
Lîk eyler der ü dîvârı harâb
Mansıb u câha heveskâr olma
Taleb-i 'izzet içün hâr olma
Ehl-i mansıbda bulunmaz râhat
Hâl-i bî-'azldedir emniyyet
Zillet-i 'azline degmez nasbı
Sarfına ser-be-ser olmaz gasbı
Olma paşalık için âvâre
Tabl u surnâ ile girme nâre
Bağlama tantana-i tabla gönül
Dûrdan hoş gelir âvâz-ı dühül
Paşalık 'ömre sürer mihnetdir
Hâsılı derd ü gam u kasvetdir
Nâmı pür-kevkebe câhı 'âlî
Lîk dûzahda geçer ahvâli
Hâtırı mansıbı gibi vîrân
Sorma hîç âhiret ahvâli yaman
Zulm ederse yıkılır hâne-i dîn
Etmese bulmaz umûru temkîn
Çekdiği mihnet olunsa ta'dâd
Değmez ol mihnete Mısr u Bağdâd
Hây u hûy ile eder 'ömrü güzer
Hâsılı eşk-i ter ü hûn-ı ciger
(.......)
Matlab-ı hâcegî-i dîvânî
Ey kalem-rân-ı kitâb-ı âmâl
Nazar-endâhte-i hüsn-i me'âl
Ger Sitanbul'a düşerse seferin
Mansıba etse ta'alluk nazarın
Olma reh-berde-i tedrîs ü kazâ
Kâdı-'asker de olursan farazâ
Sanma zinhâr anı râhatlı tarîk
Emn ü âsâyişi yokdur tahkîk
O tarîkin hatarı bî-haddir
İntizâr-ı emeli mümteddir
Silsile kaydı uzun sevdâdır
Pâyeler mûsile-i gavgâdır
(.....)
Kırk ile gerçi mülâzımsın sen
Okuyup yazmağa 'âzimsin sen
Budur ahvâl-i tarîk eyle şekîb
Ede Hak hayırlısın sana nasîb
Bilirim ehli degilsin ammâ
Olma cûyâ-yı tarîk-i ümenâ
Mâl-ı mîrîye karışma zinhâr
Eyleme 'ayşına mîrîyi medâr
(......)
Görmedim ben hele bu devletde
Hâcelikler kadarın râhatda
Cümlenin mu'teber ü âsânı
Mansıb-ı hâcegî-i dîvânî
Hâcelikden biri olursa nasîb
Sür rü'ûsu gözüne etme şekîb
'İzzet olmaz o kadar yanımda
Çok şerefdir hele vicdânımda
Matlab-ı lâzıme-i hayr-du'â
(......)
Versin Allâh sana 'ömr-i dırâz
Olasın 'ilm ü 'amelde mümtâz
Olasın kâ'im-i mihrâb-ı salâh
Bulasın mertebe-i fevz ü felâh
(........)
Cem ola hânene hayr ü bereket
Girmeye kîsene mâl-ı rişvet
Lokma-i zehr-i ribâ yemeyesin
Ne güzel bâd-ı hevâ demeyesin
Her şebin kadr ola her rûzun 'îd
Göresin devlet ile 'ömr-i mezîd
Çün Ebu'l-Hayr konuldu nâmın
Hayr ede Hazret-i Hak encâmın
0
1
Yorum Yapmak için Kayıt Olun veya Giriş Yapın