Heft-Peyker’den
 
Bu sözüme dirisen lâf u haber
Nazar et nazmuma ey ehl-i nazar
 
Penc-genci çü nasîb itdi Hudâ
Araba vü Aceme cümle salâ
 
Toludur genc ile bu penc-kitâb
Kimsenün haddi degül buna cevâb
 
Urayım şevk ile Şeh-nâme’ye dest
Hasm ol kaldı idem anı da pest
 
Yazayum Târîh-i Osmânî’yi ben
Kıssası râst dur[ur] nazm[ı] hasen
 
Anun efsâneleri oldı dürûg
Yok çerâgında dürûgında fürûg
 
Bunlarun eyledügi lîk cihâd
Râstdur eyleyemez kimse inâd
 
Eyliyeyüm anı bir hûb-kitâb
Şâh-nâme’ye ola tâ ki cevâb
 
Avn-i Hak ile idüp anı temâm
Kılayum emrüme Firdevsî’yi râm
 
Çünki Hak’dan bana nazm oldı atâ
Dil uzatmak bana gâyet de hatâ
 
Dâd-ı Hak’dur bu cevâhir bana ne
Aybdur zîşt dimeklik hasene
 
Nazmuma eyler isen lîk hased
Di nazîrini bunı eyleme red
 
Bulamaz kimse buna ayb u kusûr
Zîştdür dinse revâ ola mı hûr
 
 İlm çok olmasa bu ömr kasîr
Komak olur idi âsâr-ı kesîr
 
Her birisinde yazup ben de kitâb
Derc iderdüm nice redd ile cevâb
 
Mefharüm sanma ki nazm ola hemîn
Sînem içinde besâ genc-i defîn
 
Nazmdan lîk murâdum bu hemân
Beni unutmaya sultân-ı cihân
 
..........
Arturup itdügüm ol arz-ı hüner
Ki ide bana inâyetle nazar
 
Çü sever kâmili ol ehl-i celâl
Farzdur arz ide her bende kemâl
..............