Her meclisin ahbâbını hem-dem mi sanırsın

149

 (Mefûlü Mefâîlü Mefâîlü Faûlün)

 

 1 Her meclisin ahbâbını hem-dem mi sanırsın

 Her gördügümüz bâde-keşi Cem mi sanırsın

 2 Güller gibi giryânlıgıma hande edersin

 Ey gonce-dehen eşkimi şeb-nem mi sanırsın

 3 Vâkıf mı habâyâ-yı zevâyâ-yı vücûda

 Her kâleb-i insânı sen âdem mi sanırsın

 4 Biz mest-i ser-endâz-ı mey-i ışk-ı Hudâ’yız

 Zâhid bizi kendin gibi sersem mi sanırsın

 5 Her bir nigehin sürme-i âvâz-ı recâdır

 Yohsa dil-i dem-besteyi ebkem mi sanırsın

 6 Dinle sözümü Haşmet’i şâyân-ı visâl et

 Ben eyledigim pendi sana kem mi sanırsın

 

 

Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ