Her Zerrenün Çü Behresi Var Âfitâbdan
27.02.2017Her Zerrenün Çü Behresi Var Âfitâbdan
Her zerrenün çü behresi var âfitâbdan
Arzun nasîbi cür’a-i câm-ı şarâbdan
Bâd oldı zinde nefh-i dem-i nev-bahârla
Hâk itdi hande reşha-i feyz-i sehâbdan
İrse ‘aceb mi bendeye de lutf-ı âsafî
Gerçi ki zerreden kemem ednâ türâbdan
Müstagni kıldı terbiyeti Şâh Kâbilî
Feyz-i sehâb u mihr eser-i bâd u âbdan
Sıyt u sadâsı eyledi fârig halâyıkı
Medh ü senâ-yı Rüstem ü Efrâsîyâbdan
Zerre irer mi terbiyet-i mihre irmese
Ana meded efendi eger nûr u tâbdan
Takrîb-i ‘ışk u şevk-i kazâ zikr-i âl ile
An ‘Âşıkı ki hâli degüldür sevâbdan
0
0
Yorum Yapmak için Kayıt Olun veya Giriş Yapın