Hoy-kerde-rû iderse o gül-berg-i ter zuhûr
21.07.2017
mef’ûlü fâ’ilâtü mefâ’îlü fâ’ilün
1. Hoy-kerde-rû iderse o gül-berg-i ter zuhûr
Gözden be-cây-i eşk ider âb-i güher zuhûr
2. Dil-teng-i cevre şehd-i mükâfât ider zuhûr
Tûtî kafes-nişîn iken eyler şeker zuhûr
323
3. Bî-hûde itme ehl-i riyâdan ümîd-i feyz
İtmez dıraht-i huşk-nümâdan semer zuhûr
4. Tab’-i dürüşti rûy-i mülâyim zebûn ider
Ber-geşte eyler âbda ‘aks-i suver zuhûr
5. Bî-la’l-i yâr ‘işret olur telh ü nâ-güvâr
Meyden ider habâb ile sad çeşm-i ter zuhûr
6. Dil çîn-i zülf-i yârde kaldı esîr-i bend
Ey bâd-i subh eylemedi bir haber zuhûr
7. ‘Azm itse kûy-i yâre dil-i nâ-tüvânumun
Reng-i perîdesinde ider bâl ü per zuhûr
8. Âzürdedür tabançe-i dest-i nigâhdan
Hat sanma rûy-i yârden itdi eser zuhûr
9. Gird-âb-i bahr-i âteş ider hâle-i mehi
Sûz-i nihânum eylese dilden eger zuhûr
10. Sâmî bu nev-kumâş sezâ ferş-i pây ola
K'itdi o şâh-bender-i taht-i hüner zuhûr
11. ‘Ankâ-nazîr hazret-i Nâbî efendi kim
Sânîsi yokdur ideli nev’-i beşer zuhûr
12. Üstâd-i kül hıdîv-i cihânbân-i mülk-i nazm
Şânından eyler ‘âlem-i eş’âra fer zuhûr
13. Gayretle çok cevân-i hünermendi pîr ider
Tab’-i bülendi eylese pîrâne-ser zuhûr
14. Hak mustazıll-i sâye-i memdûd-i ‘ömr ide
Tâ kim cihânda eyleye şâm ü seher zuhûr
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0
