KASİDE 1 Ehl-i îmâna oldı menzilgâh
30.07.2017
KASİDE
1
Fe‘ilâtün/ Mefâ‘ilün/ Fe‘ilün
Ehl-i îmâna oldı menzilgâh
Cennet-i lâ ilâhe illallâh
Cânı âzâd ider cihândan
Rahmet-i lâ ilâhe illallâh
Ser-be-ser kâ'inâta toptoludur
Heybet-i lâ ilâhe illallâh
Nâme-i ehl-i şirki nesh eyler
Hüccet-i lâ ilâhe illallâh
5 Def‘ ider harâret-i ma‘sıyeti
Şerbet-i lâ ilâhe illallâh
Gam-ı cürmi ba‘îd ider dilden
Kurbet-i lâ ilâhe illallâh
Miss-i kalbi ider zer-i hâlis
Haslet-i lâ ilâhe illallâh
Tevbe kıl her günâha ister iseñ
Vuslat-ı lâ ilâhe illallâh
Oldı gün gibi evc-i rif‘atde
Râyet-i lâ ilâhe illallâh
10 Degme bir kimseye nasîb olmaz
Devlet-i lâ ilâhe illallâh
Gül-şekerdür dehân-ı zâkirde
Lezzet-i lâ ilâhe illallâh
Pîş-i mü’minlere çekilmişdür
Ni‘met-i lâ ilâhe illallâh
Giderür dâr-ı vahşetüñ elemin
Ülfet-i lâ ilâhe illallâh
Serde tâc-ı vekâr u ‘izzetdür
Kisvet-i lâ ilâhe illallâh
1
15 Câme-i fahrdür ki key yaraşur
Hıl‘at-i lâ ilâhe illallâh
Tekye-i dilde ‘ârif oldur ide
Hıdmet-i lâ ilâhe illallâh
Zikr kıl düşdügince fevt itme
Fursat-ı lâ ilâhe illallâh
Zâkirüñ göñlini münevver ider
Midhat-i lâ ilâhe illallâh
Elüñ alup irişdürür ‘arşa
Himmet-i lâ ilâhe illallâh
20 Nûr-ı ‘îmânuñı ziyâde ider
Kesret-i lâ ilâhe illallâh
Dil-i târîki rûşen itmekdür
‘Âdet-i lâ ilâhe illallâh
Mü’min oldur ki ola göñlinde
Ragbet-i lâ ilâhe illallâh
Çalınur çünki günde beş kerre
Nevbet-i lâ ilâhe illallâh
Kılalum biz de cân ile dilden
Tâ‘at-i lâ ilâhe illallâh
25 Hamdü lillah baña musahhardur
Milket-i lâ ilâhe illallâh
Hak Ta‘âlâ müyesser itmişdür
Kudret-i lâ ilâhe illallâh
Ehl-i ‘irfân ile kılalum gel
Sohbet-i lâ ilâhe illallâh
Çekelüm gel senüñle ey sûfî
Halvet-i lâ ilâhe illallâh
Dil serâyını rûşen eyledi çün
Tal‘at-i lâ ilâhe illallâh
30 Kesret-i şugl-i gayrı terk it kıl
Vahdet-i lâ ilâhe illallâh
2
Şükrüm oldur ki gitmedi dilden
Tâkat-i lâ ilâhe illallâh
Dem-i âhirde ola oldur ümîd
Şefkat-i lâ ilâhe illallâh
Ravziyâ kıl bu bezm-i hâs içre
‘İşret-i lâ ilâhe illallâh
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
0
0
Yorum Yapmak için Kayıt Olun veya Giriş Yapın