KASİDE 3 Zamânum âhire irdi ‘ibâdâtumda kıllet var
30.07.2017
KASİDE
3
Mefâ‘îlün/ Mefâ‘îlün/ Mefâ‘îlün/ Mefâ‘îlün
Zamânum âhire irdi ‘ibâdâtumda kıllet var
Yaraşur baña aglarsam ki ol kılletde kesret var
Vuzûéya niyyet eylersem niçe mâni‘ zuhûr eyler
Vuzû’dan ger elüm yursam ferâgumda sühûlet var
Hatâ vü sehv ü noksân u halelden olmadum hâlî
Namâza ger şürû‘ itsem hulûs üzre ne niyyet var
Rükû‘umda sücûdumda olur sehv ü hatâ zâhir
İlâhî ne namâzumda saña lâyık tahıyyât var
5 ‘Aceb niçe olur hâlüm benüm rûz-ı kıyâmetde
Ki her bir mevkufında gûne gûne havf u haşyet var
Emîn eyle anı telbîs-i iblîsüñ belâsından
Yanuñda dîn ü îmân adlu bir iki emânet var
Sezâvâr-ı ‘atâya eyleyüp kıl lâyık-ı rahmet
Hatâ bir kerre sâdır olsa biñ kerre nedâmet var
Habîbüñ Mustafâ’yı görmek ister rûz-ı mahşerde
Aña cân u cenân hasret cigerde dâg-ı hasret var
Gülistân-ı cinân seyrânın eyler ârzû göñlüm
Karâr u sabr u ârâm eylemez ‘ömrümde sür‘at var
7
10 Niçe vâsıl olam maksûda kaldum sâhil-i gamda
Geçilmez ara yirde niçe yüz deryâ-yı hayret var
Senüñ dergâhuña geldüm İlâhî fazluñ ihsân it
Düşersem ‘adlüñe mazhar baña dûzahda zahmet var
Seni kim kâdir olur medhe ey Kayyûm Kâdir kim
Saña lâyık idem medh ü senâ bende ne kudret var
Yol iki oldı derdâ bilmezin kim kanda gidem ben
Birisi mustakîm anuñ birisinde sekâmet var
Tarîk-ı mustakîme sen bizi sevk eyle yâ Hâdî
‘Azâb-ı dûzaha atma giriftâr anda mihnet var
15 Bizi ol yola sevk eyle habîbüñ hakkiçün yâ Rab
Ki anda hûr u gılmân u na‘îm u kasr-ı cennet var
Ne ‘ilm ü ne ‘amel var kim ben anı idinem mesned
Ümîdüm saña tutdum kim senüñ yanuñda rahmet var
Fenâ bâzârgâhında metâ‘-ı ‘ömri satdum ben
Ecel geldi yakîn irişdi ‘ukbâya ‘azîmet var
Ecel serhaddine irdüm kıyâmet sâ‘at irişdi
Hayâtumda hemân ancak benüm bir iki sâ‘at var
İlâhî lutf u ihsân it bizi îmândan ayırma
Şefî‘ idinmişüz anı ki zâtında risâlet var
20 Garîk-i bahr-ı isyânuz bize lutfuñla rahmet kıl
Bulur andan halâs ol kim serinde tâc-ı devlet var
Tehî-destüz senüñ dergâhuña geldük hemân ancak
Habîbüñ Mustafâ’ya cân ile dilden mahabbet var
Husûsâ çâr-yâr-ı bâ-safânuñ âl ü ashâbuñ
Derûn-ı sînede her birine yüz biñ meveddet var
Benüm âbâ vü ecdâd-ı ‘ızâmum âb-ı rûyıçün
Günâhumdan beni pâk it ki anlarda siyâdet var
Agardı rîşüm ü beñzüm sarardı ey ecel gel kim
Pilav zerdesi olmış[dur] müheyyâ bir ‘imâret var
25 Saña varsam gerek ey kabr-i târîk ivme bir lahza
Ecel mihmânum olmışdur bugün anı ziyâfet var
8
Yeñi yokdur yakası yok dikildi baña bir câme
Giyince anı sabr eyle ezelden eski ‘âdet var
Şefîr-i kabre geldi ten dirîgâ cândan ayrıldum
Aña ben niçe girem ki anuñ içinde zulmet var
Baña ol beyt-i vahşetde su’âl itmek murâd idüp
Gelür iki melekler kim likâsında mehâbet var
‘Atâ vü lutfuñı izhâr idüp ol demde yâ Mu‘tî
Cevâba kâdir eyle saña yüz biñ dürlü minnet var
30 Sa‘âdet devlet anuñ başına kim kabre girdükde
Melekler diyeler aña cinândan saña ni‘met var
İlâhî ‘âcîz ü bî-çâreyem rahmet zamânıdur
‘Azâbuñ çekmege bende bilürsin kim ne tâkat var
Ümîdüñ kesme ey Ravzî Hudâ’nuñ rahmeti çokdur
Husûsâ kim kıyâmetde Muhammed’den şefâ‘at var
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
0
0
Yorum Yapmak için Kayıt Olun veya Giriş Yapın