Kaside 4

 

Fe’ilâtün Mefâ’ilün Fe’ilün

 

1 Hazret-i Hakk’a hamd ü ta’zîmât

Rûh-ı pâk-i Muhammed’e salavât

2 Âl u ashâbına tevâbi’ine

Sad hezârân dürûd u teslîmât

3 …… bu cümle-i a’yân

Degül idi ezelde mec’ûlât

4 ‘İlm ma’lûma tâbi’ ü tâlî

Beyyine beyyine degül hâcât

5 Ol cihetden cenâb-ı ‘izzetde

Bir degüldür cemî’-i mevcûdât

6 Hikmet’ullâh iktizâ itdi

Ki ri’âyet olına haysiyyât

7 Ne dilerlerse anı feyz ider

Kime tâ’at ü kime Lât u Menât

8 Kasr-ı mâhiyyet olmaya tâ kim

Derekât ehli bulmaya derecât

9 Su getüren señek sıyan bir ola

Uymadı hikmete bu bed harekât

10 Gerçi mefzûle göre hoşdur bu

Fâzıla lîk haybet ü haserât

11 Şe’n-i Hakk itmedi bu şeyni kabûl

Yaraşur aña ahsen-i hâlât

12 Sünnetu’llâhdur bu vaz’-ı şerîf

Bu durur tavr u ‘âdet-i sâdât

*

 Bu ebyât-ı hikmet-âyât dahi Zekeriyyâ Efendi’ye [virilmişdür]

3a. Okunaksız.

FİLİBELİ VECDÎ VE DİVÂN’I 21

13 Fırka-i fâzılân-ı hikmet-bîn

Oldılar cümleten bu yola üstâd

14 ‘Ulemâ zümresinde anuñ içün

İ’tibâr olınurdı zât ü sıfât

15 Hayfdur devletüñde sultânum

Zâyi’ ola bu ahsenü’l- hasenât

16 ‘Âlim ü câhil ‘ârif ü ‘âmî

Ber-ri’âyet ola zihî tâmmât

17 ‘İlm ü fazl ü kemâl ü ma’rifete

Galebe eyleye zamân bi’z-zât

18 Cem’ ola bir arada bûm ü hümâ

Âdemîlerle haşr ola haşerât

19 İ’tibâr olmaya yemîn ü şimâl

Salih ü tâlihe virile berât

20 Bilürüz bu emirde muztardur

Hazret-i kâdı-ı kudât u guzât

21 Bu ‘amel iktizâ vü ‘usr iledür

Budur insâf ile olan kemâlât

22 Kıssa ma’lûmdur garaz mefhûm

Niçe bir ‘arz olına ma’lûmât

23 Lâzım-ı fâ’ide düşer haber

Silk-i inşâda nazm olan ebyât

24 Gel hıyâm-ı senâya eyle kıyâm

Tay olınsun tınâb-ı ıtnâbât

25 Münebbih olup du’â idelüm

Nevm-i gafletde geçmesün evkât

26 Mansıb-ı devletine olmaya had

Müddet-i ‘ömri bulmaya gâyât

27 Hibe eyledügüñce Vecdî’ye

‘İvâz eyleye vâhibü’l-berekât

28 Hibr-i zulmâni ile her gice

Toldugınca bu idi çîni devât

29 Kalem-i fazluñ ile her dem-i subh

Pür mezâyâ görine nüh safahât

30 Bikr-i ma’nâ olup der-âgûşuñ

Ola hem-sohbetüñ nebât-ı nikât

31 Tona dünyâ yüzini tefsîrüñ

Ola nâmuñ müfessirü’l-âyât

32 İki ‘âlemde hayr-ı maksûduñ

Vire Allâh kâdiyyü’l-hâcât

 

Prof. Dr. Hasan KAVRUK, Dr. Bahir SELÇUK, FİLİBELİ VECDÎ ve DÎVÂN’I (METİN-DİZİN), © T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3366 ,MALATYA 2009