KASİDE
Bahâriyye-i Sâmî
mef’ûlü fâ’ilâtü mefâ’îlü fe’ûlün
1. Hengâm-i dey irişdi yine bâd-i subh-dem
Oldı çemen-tırâz-i nev-âyîn-i köhne dem
75
2. Nakkâş-i tâze-tarh-i bahâr-i kühen yine
Levh-i zemîne eyledi nakş-i siyeh kalem
3. Gûyâ ki hall idüp zehebi lâceverdî cû
Evrâk-i bûstâna çeker cedvel-i ‘Acem
4. Eyler hisâb nakd-i zerin hâzin-i hazân
Zencîr-i hurde-mevce-i cûdan döküp rakam
5. Sultân-i sayf idince sefer celle ismuhu
İtdi bih ü enârı bihîn-top-i zer-’alem
6. Zâtında togrıluk görüp itdi mü’ebbeden
Sebze bahârı nâmiye tîmâr-i serve zam
7. Istanbulun hevâ-yi latîfi ‘ale'l-husûs
Oldı bu fasl içinde safâ-bahş-i bîş ü kem
8. Ahsente i’tidâl-i hevâ-yi Sıtanbula
K'olmış hacâlet ile nihân gülşen-i İrem
9. Oldı fusûl-i çârda yek-reng-i Çâr-bâg
Sayf ü şitâsıdur gül-i ra’nâ-yi ‘ayş ü dem
10. Pür-nahl-i sûr dâhil-i sûrında ravzalar
Sad devha hâricinde anun der-kenâr-i yem
11. Magz-i seri hemân seped-i gül-fürûş olur
Yâd eylese hevâsını bir şeyh-i pür-herem
12. Her tahte-i şükûfe künûz-i defînedür
K'olmış nühüfte anda nice dürc-i beste-fem
13. Vaktinde şakk-i arz idüp üstâd-i nâmiye
İzhâr ider cevâhir-i medfûnı dem-be-dem
76
14. Tarh idüp âbnûsî siyeh pîş-tahteler
Üstâd-i bâgbân-i çemen-perver-i hikem
15. Saklar piyâz-i lâleyi kat kat harîr ile
Cevfinde hem-çü la’l ü yevâkît idüp be-hem
16. Zerrîn kadehle jâle-i terden ‘arak görür
Her tahte oldı nergise şâhâne taht-i Cem
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0