Kasîde be-nâm-ı pâdşâh-ı dîn-penâh
Kasîde be-nâm-ı pâdşâh-ı dîn-penâh
Mef’ûlü Fâ’ilâtü Mefâ’îlü Fâ’ilün
1 Ey şâh-ı dîn-penâh ‘ale’l-birri ve’t-tükâ
Ve’y pâdşâh-ı mülket-i dünyâ ‘ale’l-hüdâ
2 Ey câmi’-i cemî’-i kemâlât-ı kâ’inât
Sensin Muhammed ümmetine hısn-ı mültecâ
3 Hâmî-i dîn ü hâfız-ı seccâde-i nebî
Zât-ı kerîmüñe ne disem Husrevâ revâ
4 Başuñda tâc-ı saltanat-ı dîn-i Ahmedî
Zıll-ı zalîl-i hazret-i Hakk egnüñe kabâ
5 İki cihân sa’âdeti sâbit eyledüñ
Ey şâh-ı ‘âlem itmek ile nefy-i mâ-sivâ
6 Sultân-ı dehr Hân Murâd ibni Şeh Selîm
Hâk-i der-i sa’âdetidür kuhl ü kîmyâ
7 Şâh-ı ‘Acem şerîf-i ‘Arab ‘arz idüp hulûs
Lebbeyk okur kapuñda iki ‘abd-i kem-bahâ
8 Dâg-ı elemle şâh-ı ‘Acem didi tâ-be-key
Oglın kapuña bende kılup itdi ilticâ
9 Evsâfuñ işidüp şeh-i A’câm didi hoş
Görüp şerîf-i hasletüñi didi habbezâ
10 Re’yüñle itmedüñ bu olan dürlü işleri
Şer’-i şerîfe tâbi’ olup itdüñ ibtidâ
11 Yol gösterüp ‘asâkirüñe çâr-yâr-ı dîn
Bu vâdiye meşâyıh-ı şer’ oldı reh-nümâ
10a. Re’yüñle: Kendüñden sahh.
FİLİBELİ VECDÎ VE DİVÂN’I 15
12 Ervâh-ı evliyâ-yı ‘Acem bu yire gelüp
Sen pâdşâhı da’vet idüp didiler be-y-â
13 Hark itdi tîguñ ‘âlemi akdı memâlike
Âb-ı revân emr-i Hudâ şer’-i Mustafâ
14 İrân diyârın eyledi vîrân ‘askerüñ
Şirvân iline hükmi revân eyleseñ n’ola
15 Asduñ gazâ kılıncını ‘arş üzre râyeti
Ahsente didi her işiden şâh eger gedâ
16 Her bir gedânuñ işi degül medh-i pâdşâh
Kanber ne bile n’eydügini kadr-i Murtazâ
17 Budur şi’rüñ muhassalı ey şâh-ı kâmkâr
Dir gülsitânda bülbül-i Sa’dî-i hoş-edâ
18 Ber-tu’st pâs-ı hâtır-ı bî-çâregân u şükr
Ber-mâ u ber-Hudâ-yı cihân-âferîn cezâ
19 Vecdî kazâ belâsını çekmişdür ol kadar
Budur garîb yine olur tâlib-i kazâ
20 ‘Azl üzre geçdi iki yılı cân zamânıdur
Yazılsa aña hatt-ı hümâyûn-ı pâdşâ
21 Ol ‘abd-i nâ-murâda eger iltifât ola
Dubniçe’nüñ kazâsıdurur matlab u münâ
22 Kes sözi keyyis iseñ uzatma hikâyeti
Kıl pâdşâh-ı ‘âleme bir hayr ile du’â
23 Hak hazretinde cümle murâduñ bula husûl
Şâhum cihânda devlet ü ‘izzet ile çok yaşa
Prof. Dr. Hasan KAVRUK, Dr. Bahir SELÇUK, FİLİBELİ VECDÎ ve DÎVÂN’I (METİN-DİZİN), © T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3366 ,MALATYA 2009
