Kasîde Berâ-yı Sultân Ahmed Hân
26.06.2016
Kasîde Berâ-yı Sultân Ahmed Hân
1. Habbezâ ey taht u tâcın mâye-i zîb ü feri
Âlemin ârâyişi mülkün tırâz u zîveri
2. Habbezâ ey tâc-bahşâ-yı Ferîdûn u Kubâd
Habbezâ ey müttekâ-pîrâ-yı mülk-i Kayserî
3. Habbezâ ey şu‘le-i şemşîr-i dest-i saltanat
Ey fürûğ-ı rûy-ı hurşîd-i sipihr-i serveri
4. Rahşın olmasa felek olmazdı böyle pür-şitâb
Peykin olmasa kamer giymezdi bu tâc-ı zeri
5. Avfa muhtâcım bu ta‘bîrimde taksîr eyledim
Belki ey yektâ-neverd-i ser-zemîn-i dâveri
6. Na‘l-i zerdir mûze-i peykinde mâhın gurresi
Gûydur çevgân-ı pây-i rahşına çarhın seri
7. Secde-ber mihrâb-ı na‘l-i esbine mâh-ı felek
Müftehir bûs-ı süm-i rahşınla mihr-i hâveri
8. Mükteseb yalmân-ı tîğından dırahş-ı âftâb
Müntehab fass-ı nigîninden fürûğ-ı müşteri
9. Şehriyârâ sensin ol ferman-revâ-yı dehr kim
Âsman dergâhının bir bende-i ferman-beri
10. Sâye-i bezmin celâl ü câhın âsâyişgehi
Râ'yet-i azmin hümâ-yı devletin bâl ü peri
11. Böyle tahrîr etdi levh-i mihre vasf-ı pâkini
Kâtib-i çarhın ser-i kilk-i ma‘ânî-perveri
12. Hırz-ı cân-ı saltanat nîrû-yı bâzû-yı zafer
Rükn-i savlet unsur-ı haşmet esâs-ı saf-deri
13. Hânuman-zîb-i celâl ârâyiş-i mecd ü şeref
Seyf-i sârım bîşezâr-ı satvetin şîr-i neri
14. Sûret-i akl-ı müşahhas peyker-i zihn-i selîm
Akl-ı kül burc-ı kemâlin âftâb-ı enveri
15. Ya‘ni Sultân Ahmed-i Gâzi ki dûş-ı kadrine
Atlas-ı gerdun müzerkeş tügmeli bir anteri
16. Şehriyârâ âsman-kadrâ hidîvâ dâverâ
Ey eden kem-kadr hâk-i pâyi müşk-i ezferi
17. Cüst ü cûy-ı ma‘nî-i vasfınla akl ü fikr ü fehm
Geşt ederken zîr ü bâlâ-yı sipihri serseri
18. Rast geldi peyk-i endîşem bu garrâ matla‘a
Çarh-ı çârümden öte arş-ı mu‘allâdan beri
19. Dest-i kahrından ruh-ı çerh-i kühen nîlüferî
Bâğ-ı lutfundan behişt-i heşt bir verd-i tarî
20. Âb eder te'sîr-i kahrın kûhsâr-ı âheni
Ebr eder lutfun duhân-ı kûre-i âhengeri
21. Şöyledir merdânegî zâtında kim hâb içre ger
Bir gece görse hayâlin Zâl-i çarhın gözleri
22. Erte meydân-ı recûliyetde bayrak-bend olur
Nîze-i Behrâma nâhid-i sipihrin mî‘ceri
23. Kabza-i teshîrine mevhûb kavs-ı Rüstemî
Bâzû-yı ikbâline mevrûs zûr-ı Hayderî
24. Mükteseb âdet değil hûy-ı cibillîdir sana
Kâm-bahşî mekremet-kârî merâhim-güsterî
25. Sensin ol sultân-ı âlişan k'olur bezminde cem‘
Zührenin çengi mehin ibrıki mihrin micmeri
26. Sensin ol dâver k'olur rezminde dâim kârger
Kahramânın tîğı Sâmın gürzi Zâlın hançeri
27. Olmasa eyyâm nâm-ı âlem-ârâna karîn
Zahm ururdu sîne-i eyyâma mîm-i hançerî
28. Saltanat baş urmayaydı dergeh-i ikbâline
Tîğ-veş âzâr ederdi re'si lafz-ı efseri
29. Cebhe-i pâkindeki berk-ı necâbetden eger
Meş‘al-efrûz-ı cemâl olsaydı mihr-i hâveri
30. Eyleyüp dünyâyı cûş-ı lücce-i envâra gark
Arz olurdu mevce-i deryâ-yı nûrun anberi
31. Verse bir sahrâya fer meşşâta-ı adlin olur
Çengel-i şeh-bâz mîl-i sürme-i kebk-i deri
32. Etse bir kûha güzer bâd-ı semûm-ı satvetin
Ma‘den-i gûgird eder te'siri kân-ı gevherî
33. Re'fetinden perveriş-yâb olsa bir gülşen biter
Lâle-veş hâkinde feyz-i reng-i tâb-ı dil-berî
34. Etse zîr-i sâye-i kûh-ı vakârın mültecâ
Bend eder bâl-ı piristû-beççe râh-ı sarsarı
35. Gülşeninden geçse bir takrîb ile tâ haşr olur
Çârşû-yı gül-fürûşânın meges şehbenderi
36. Olsa eltâfınla ger nefs-i nebâtî şehd-kâm
İktisâb eylerdi hanzal lezzet-i gül-şekkeri
37. Olsa bir şâ‘ir eger makrûn-ı lutf u re'fetin
Böyle eyler kilki îcâd-ı perend-i şeşterî
38. Pâdişâhım iki şâ‘irdir veren nazma revâc
Merzbûm-ı Hindde Örfî Acemde Enverî
39. Âlemi leb-rîz-i âvâz eylemişler vasf edüp
Birisi Şâh Ekberi birisi Sultan Senceri
40. Ben kulun da işte mülk-i Rûmda vasf eyleyüp
Bir senin gibi şehenşâh-ı Ferîdûn-efseri
41. Yâ nice vasf etmeyem kim dergeh-i cûdunda ben
Olmuşumdur böyle bir lutf-ı amîmin mazharı
42. Ya‘ni kıldın medreseyle abd-ı nâ-kâmın çerâğ
Oldu câ nâm-ı Nedîme bendegânın defteri
43. Husrevâne lutf edüp şâhâne in‘âm eyledin
Dest-i lutfun sildi ağlarken bu çeşmân-ı teri
44. Fahr iken ecdâdıma ol âstânın hidmeti
Hazret-i Sultân Ebü'l-fethin zamânından beri
45. Pâdişâhân-ı selefden bunca ihsanlar görüp
Her biri olmuşken ol bâb-ı refî‘in çâkeri
46. Ben kulun bî-kes muhakkar şöyle kalmışken yetîm
Mihnet ü endûh ile ağlar gezerdim serseri
47. Ne rikâb-ı devlete arz-ı merâma bir mesâğ
Ne bu bâr-ı mihnete sabr etmeğe tâb-âverî
48. Hak mü'eyyed eylesin dâmâd-ı âlî-şânını
Âsman durdukça olsun zîb-i sadr-ı dâverî
49. Kim bu bî-kes bendeni hünkârıma ta‘rîf edüp
Eyledi bu derd-mendi mihnet ü gamdan beri
50. Hak budur kim pâdişâhım böyle bir dânâ vezîr
Etmedi bu ana dek zîbende hiç bir kişveri
51. Hak Te‘âlâ devlet ü ikbâlin efzûn eylesin
Tâbi‘-i fermânın olsun devr-i çarh-ı çenberi
52. Mülkden dûr olmasın zıll-ı hümâ-yı re'fetin
Dâ'imâ kılsın himâyet şefkatın bî-kesleri
53. Arş ile hem-dûş ola tâk-ı revâk-ı haşmetin
Tâ ki ber-câdır bu âlî-kubbe-i nîlüferî
54. Sana temlîk eylesin Hak bir yere cem‘ eyleyüp
Mülk-i dehri ömr-i Hızrı devlet-i İskenderi
Prof. Dr Muhsin Macit, Nedim Divanı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ, KÜLTÜR ESERLERİ 511
